అమెరికా శక్తి క్షీణిస్తోంది.. మేం చైనా వెంటే..

internationalpakistan-would-move-towards-china-russia-as-us-is-declining-power

ఒడ్డు చేరాక తెప్ప తగలేయడం అంటే ఇదేనేమో. తన మాట వినని అమెరికాను పాక్ ఇప్పుడు శాపనార్థాలు పెడుతోంది. ఇక నీ పని అయిపోయింది.. నువ్వే మాత్రం ప్రపంచ శక్తివి కాదంటూ ఉడికిస్తోంది. ఉగ్రవాదుల ఏరివేత పేరిట అమెరికా నుంచి భారీగా నిధులు రాబట్టి ఉగ్రవాదాన్నే బలోపేతం చేసిన పాక్.. ఇప్పుడు చైనాను చూసుకొని అమెరికాను హెచ్చరిస్తోంది. నువ్వు భారత్‌తోపాటే ఉంటే మేం చైనా, రష్యాలతో జత కడతాం జాగ్రత్త అంటూ తెగ బెదిరిస్తోంది. కశ్మీర్ విషయంలో అమెరికా తాను చెప్పినట్లు వినట్లేదని తెగ ఇదై పోతోంది. ఒబామాపై కూడా ఫైర్ అవుతోంది. ఇవన్నీ చాలవన్నట్లు.. చైనా పాక్ కారిడార్‌లో చేరేందుకు రష్యా, సౌదీ, ఇరాన్ సహా అనేక దేశాలు ఆసక్తిగా ఉన్నాయని భారత్‌ను భయపెట్టేందుకు ప్రయత్నిస్తోంది. చైనాతో చెలిమి మగతలో ఉన్న పాక్ అమెరికాను డోంట్ కేర్ అంటోంది. అమెరికా ఇక ఏమాత్రం ప్రపంచ శక్తి కాదని, దాని శక్తి క్షీణిస్తోందని వ్యాఖ్యానించింది. కశ్మీర్ పట్ల, భారత్ పట్ల అమెరికా తీరు మార్చుకోవాలని లేకపోతే.. మేం చైనా, రష్యాలతో జత కడతామని ఐరాసలో కశ్మీర్ అంశంపై పాక్ ప్రధాని రాయబారి ముషాహిద్ హుస్సేన్ సయ్యద్ హెచ్చరించారు. అమెరికా ఎంతో కాలం ప్రపంచ శక్తిగా ఉండలేదు, దాని బలం తగ్గుతోంది. ఇక ఆ దేశం గురించి మర్చిపోవాలని ఆయన వ్యాఖ్యానించారు. విచిత్రం ఏమిటంటే ఆయన ఈ మాటలన్నది పాక్‌లోనో, చైనాలోనో కాదు ఏకంగా అమెరికాలోనే కావడం గమనార్హం. కశ్మీర్లో జరుగుతోన్న మావన హక్కుల ఉల్లంఘనను, హింసను అంతర్జాతీయ సమాజానికి తెలియజేయాలనే ఉద్దేశంతో సయ్యద్‌తోపాటు కశ్మీర్‌పై మరో రాయబారి షాజ్రా మన్సబ్ అమెరికా పర్యటనలో ఉన్నారు. అమెరికాలోనే పేరొందిన అట్లాంటిక్ కౌన్సిల్‌తో తమ భావాలను పంచుకున్న సందర్భంగా వారీ వ్యాఖ్యలు చేశారు. భారత్, కశ్మీర్ విషయంలో అమెరికా స్పందించడం లేదని సయ్యద్ వాపోయారు. అప్ఘాన్, పాక్‌ల విషయమై అమెరికాలో ప్రత్యేక ప్రతినిధిగా ఉన్న రిచర్డ్ ఓల్సన్‌కు కశ్మీర్లోని మానవ హక్కుల ఉల్లంఘన విషయమై ఓ పత్రాన్ని సమర్పించారు. దక్షిణాసియాలో ఇప్పుడు చైనా పాత్ర కీలకమని, గ్రేటర్ దక్షిణాసియాలో ఆ దేశం కూడా భాగమని సయ్యద్ చెప్పారు. రష్యాతో ఉమ్మడి సైనిక విన్యాసాల గురించి ప్రస్తావిస్తూ.. మాస్కో, ఇస్లామాబాద్ మధ్య సంబంధాలు నెమ్మదిగా బలోపేతం అవుతున్నాయన్నారు. తొలిసారిగా పాక్‌కు ఆయుధాలను విక్రయించేందుకు రష్యా సుముఖత వ్యక్తం చేసిందని, ప్రాంతీయ కూటముల్లో వస్తున్న మార్పులను అమెరికా గమనించాలని ఆయన హెచ్చరించారు. తాలిబన్ల విషయంలో అమెరికా ఒకడుగు ముందు, ఒకడుగు వెనక్కి వేస్తోందని విమర్శించారు. ఒకసారి వారితో మాట్లాడతాం అంటారు, మరోసారి వారి అంతు చూస్తామంటారంటూ ఒబామా వైఖరిని విమర్శించారు. కాబుల్‌లో శాంతి గురించి మాట్లాడేటప్పుడు కశ్మీర్ ఎలా రగులుతున్నదో చూడాలన్నారు. గతంలో పీడిత ప్రజల, పీడిత ముస్లింల పక్షాన అమెరికా నిలిచిందని.. కశ్మీర్ బాధలు కూడా పోవాలన్నారు. కశ్మీర్ విషయంలో ద్వంద్వ వైఖరి సరికాదన్నారు. అమెరికాతో పాకిస్థాన్‌కు సుదీర్ఘమైన అనుబంధం ఉందని, దాన్ని కొనసాగించాలని భావిస్తున్నామని సయ్యద్ తెలిపారు. కానీ ఈ విషయంలో మాకు ప్రత్యామ్నాయం కూడా ఉందని, ఈ ప్రాంతంలో రష్యా జోక్యం చేసుకోవాలని భావిస్తోందన్నారు. చైనా పాక్ ఎకనమిక్ కారిడార్‌లో చేరేందుకు ఆ దేశం కూడా సుముఖంగా ఉందని అమెరికాను రెచ్చగొట్టే ప్రయత్నం చేశారు. అంతే కాకుండా ఇరాన్, టర్కీ, సౌదీ అరేబియా కూడా ఈ కారిడార్‌లో చేరడం పట్ల ఆసక్తిగా ఉన్నాయన్నారు.

Be the first to comment

Leave a Reply

Your email address will not be published.


*